Bókasafn 
Handverksfólk Rimmugýgur verða með handverkshorn á bókasafni Hafnarfjarðar, en þar munu áhugafólk og fræðimenn hittast og stunda sögulegt handverk, endursköpun, drekka kaffi og spjalla. Allir eru velkomnir, og mikilli yndisstemmingu er lofað.
Handverkið næstu hittinga verður byggt í kringum Eura-kjólinn svokallaða en hann er nefndur eftir héraði í Finnlandi þar sem fundist hefur mikið af fornleifum frá 500 e.kr-1200 e.kr. Fatnaður varðveitist almennt ekki vel, en 1300 grafir hafa verið rannsakaðar úr sama grafreit og fornleifafræðingum hefur tekist að púsla saman líklegum sniðum úr bútum sem varðveitast aðallega undir málmhlutum, skartgripum, verkfærum og vopnum. Sniðin eru oftast einföld með beinum línum sem nýta vefstrangan vel og er Eura kjólinn einn af þeim allra nýtnustu. Sniðið er skemmtilega einfalt í samsetningu, með löngum beinum línum en krefjandi að ná réttum málum og hlutföllum. Á handverks hittingnum verður farið yfir sniðið, hvernig það virkar og hvernig er best að aðlaga það að hverjum og einum, og svo sniðið í efni sem voru notuð í skandinavíu á landnámsöld.
Tól verða á staðnum, en ef fólk hyggst sauma kjól er upplagt að mæta með efni – eða með múslin til að taka upp snið.