Munasafn

Afþreying

Nintendo Switch

Í boði eru 4 Nintendo Switch Lite leikjatölvur og eitt stærra Nintendo Switch leikjatölvusett fyrir 2-4 spilara. Öllum leikjatölvum fylgja hleðslusnúrur og tæki. Að auki bjóðum við upp á fjölbreytt úrval af tölvuleikjum fyrir þessar tölvur.

DVD-spilarar

4 DVD spilarar eru til útláns ásamt fjarstýringu og HDMI-snúru til að tengja við sjónvarp. Einnig er hægt að leigja utanáliggjandi geisladrif til að tengja við tölvu.

Vasadiskó

Hægt er að fá lánað vasadiskó til að hlusta á kassettur. Það er líka hægt að tengja það við tölvu og færa efni af kassettum yfir á stafrænt form.

Bakstursáhöld

Boðið er upp á fjölbreytt úrval af alls kyns kökuformum fyrir margvísleg tilefni, allt frá kransaköku fyrir ferminguna til Spider Man-köku fyrir barnaafmælið. Einnig eru í boði piparkökuform, smákökumót og kökustimplar.

Einnig eru til útláns tvö bökunarbox, sem innihalda allt það helsta sem þarf fyrir bakstur:

• eldhúsvigt
• kökukefli
• bökunarmottu
• deigsköfu
• 2 sleikjur
• 2 mæliskeiðar
• 2 spaða
• 4 hringlaga form

Formin má finna í Setustofunni og leiðbeiningar um notkun og þrif fylgja. Nauðsynlegt er að skila öllum áhöldum hreinum.

Saumavélar

Fimm einfaldar Singer-saumavélar eru til útláns á 2. hæð. Með þeim eru helstu fylgihlutir sem þarf fyrir saumaskap: spólur, aukanálar, saumfætur og fleira.

Einnig eru á staðnum einföld Elna-saumavél og Brother Overlock-saumavél með leiðbeiningum og fylgihlutum. Öllum er frjálst að koma og nota.

Straujárn og straubretti eru til staðar svo að hægt sé að slétta saumaskapinn.

 

Verkfæri

Í Setustofunni má finna verkfæri sem er gagnlegt að hafa við höndina við ýmis verk innan heimilis sem utan. Til eru tvö verkfærasett sem innihalda:

• hamar
• töng
• skiptilykil
• skrúfjárn
• 12 skrúfbita

Einnig eru í boði tvær þráðlausar borvélar og ein skrúfvél. Með þeim fylgja hleðslutæki ásamt fylgihlutum. Að auki eru í boði ýmis minni verkfæri, eins og málband, hallamál og sett með skrúfjárni og 24 litlum skrúfbitum.