Safnkostur

Nýjar bækur

Allar nýjar bækur á íslensku eru á 1. hæð. Eftir 1 ½ ár færast skáldsögur og ævisögur á 2. hæðina, fræðibækur og ljóðabækur flytja upp eftir 6 mánuði.

Sakamálasögur í kilju og Rauða serían (nýjustu árin) eru einnig á 1. hæðinni.

Nýjar skáldsögur á erlendum málum eru staðsettar á 3. hæðinni.

Hljóðbækur

Hljóðbækur eru á 1. hæðinni, hjá sófunum. Í boði er fjölbreytt úrval af hljóðbókum á diskum, bæði skáldsögur á íslensku og ensku sem og fræðsluefni. Flest efnið er á MP3-formi en eitthvað er um hefðbundna geisladiska líka.

Bókasafnið kaupir allar hljóðbækur sem koma út á CD eða MP3 formati á íslensku. Útgáfa á slíku hefur þó dregist saman á síðustu árum en reynt er að bæta jafnt og þétt við áhugaverðu eldra efni í hljóðbókahillurnar.

Hægt er að spila MP3-diska í geislaspilurum sem eru gerðir fyrir MP3.
Einnig er hægt að nota DVD spilara eða tölvur til þess að hlusta á MP3-diska.

Tímarit

Nýjustu tölublöð tímarita eru ekki til útláns heldur sett í möppur svo gestir geti blaðað í þeim í setustofunni. Strax og nýtt tölublað berst til bókasafnsins er því svo skipt út og eldra heftið fer í útlán.

Í setustofunni eru tímaritakassar með eldri heftum af:

dægurblöðum á íslensku, ensku, dönsku, norsku og þýsku
húsbúnaðarblöðum

DVD-myndir

Bókasafnið á mikið úrval af mynddiskum, bæði fræðslumyndum og afþreyingarmyndum.

Útlán á DVD-diskum eru gjaldfrjáls. Útlánstíminn er misjafn, frá 7 dögum til 14 daga.
Megináhersla er lögð á að kaupa inn íslenskar myndir, barnaefni, fjölskyldumyndir, valdar verðlaunamyndir og þær myndir sem vinsælastar hafa verið í kvikmyndahúsunum.
Ekki má skila geisladiskum eða DVD-myndum í skilalúgu vegna hættu á skemmdum.

Tónlistardeild:

Tónlistardeild Bókasafns Hafnarfjarðar er stærsta tónlistardeild í almenningsbókasafni á landinu. Mynddiskar, geisladiskar og hljómplötur á tónlistardeild eru lánaðar í 14 daga án endurgjalds. Einnig eru lánaðar út nótur og bækur um tónlist. Hægt er að hlusta og grúska á staðnum.

Bökunarform:

Bókasafn Hafnarfjarðar býður upp á útlán á bökunarformum af ýmsum stærðum og gerðum.

Eftirfarandi reglur gilda um útlán og meðferð bökunarformanna:

Nauðsynlegt er að skila formunum hreinum. Leiðbeiningar um notkun og þrif fylgja.
Kökuformin eru lánuð út í 14 daga og dagsektir eru 45 kr.

Spil og púsl

Á Bókasafni Hafnarfjarðar er til fjölbreytt úrval borðspila, púsluspila og hlutverkaspila fyrir alla aldurshópa. Spilin eru að jafnaði lánuð út í 14 daga og allir sem eru með gilt bókasafnsskírteini hjá Bókasafni Hafnarfjarðar geta fengið þau að láni.