Bókasafn Hafnarfjarðar býður upp á fjölbreytta aðstöðu fyrir fólk á öllum aldri. Hægt er að bóka rými fyrir fundi, námskeið, listasýningar og margt fleira. Fjölnotasalur Í kjallara bókasafnsins er salur fyrir fundi og litla viðburði á afgreiðslutíma bókasafnsins. Ef salurinn er ekki bókaður fyrir starfsemi bókasafnsins eða Hafnarfjarðarbæjar er mögulegt að fá salinn að láni fyrir klúbba, hópa og minni samkomur. Aðstaða Skjávarpi. Borð og stólar í boði. Lítill eldhúskrókur. Fyrirspurnir um fjölnotasalinn má senda á [email protected]. Glerrýmið Glerrýmið er lítið les- og sýningarrými á 3. hæð bókasafnsins. Það er hentugt fyrir litlar vinnusmiðjur og listasýningar. Nafnið er tilkomið af glerveggjum sem skarta útsýni eftir allri Strandgötunni. Glerrýmið er opið öllu listafólki sem hefur áhuga á að sýna þar. Venjan er að hver listamaður fái að hafa verkin sín uppi í 4 vikur án endurgjalds. Bókasafnið býður upp á að hafa verkin til sölu ef vilji er til þess, listamanni að kostnaðarlausu. Fyrirspurnir um Glerrýmið má senda á [email protected]. Græjurými Græjurýmið er í glerhýsi á 2. hæð og er fyrir 15 ára og eldri. Þar er netkaffi með ókeypis aðgangi að tölvum, þrívíddarprentari, vínilskeri og hitapressa til að prenta á boli. Ókeypis aðgangur að Internetinu. Ekki er hægt að vista gögn í tölvunum. Hægt er að skanna inn og senda skjöl í tölvupósti. Útprentun og ljósritun (A4) er í boði gegn gjaldi samkvæmt gjaldskrá. Princh prent-, ljósritunar og skönnunarlausnin Númer prentara Bókasafns Hafnarfjarðar: 113000 Útprent með Princh – leiðbeiningar Hægt er að prenta úr eftirfarandi tækjum: Almenningstölva: 1. Opnið skjalið og veljið Print 2. Veljið Princh sem prentara og smellið aftur á Print 3. Farið yfir prentstillingar í Princh glugganum sem birtist 4. Greiðið með einum af greiðslumöguleikunum Fartölva: 1. Opnið vafra og farið inn á print.princh.com 2. Sláið inn prentaranúmerið og hlaðið upp skjölum 3. Farið yfir prentstillingar 4. Greiðið með einum af greiðslumöguleikunum Snjallsími eða spjaldtölva: 1. Sækið Princh smáforritið fyrir iOS/Android eða prentið án þess að sækja smáforrit 2. Opnið skjalið og deilið því með Princh smáforritinu* 3. Veljið prentara með því að skanna QR-kóðann (eða slá inn númerið 113000) og farið yfir prentstillingar 4. Greiðið með einum af greiðslumöguleikunum *Ef þið getið ekki eða viljið ekki sækja smáforritið, þá er einfalt að að skanna QR-kóðann hér fyrir neðan með myndavélinni á tækinu ykkar og fylgja leiðbeiningunum á skjánum. Gjald fyrir útprentun (A4) er samkvæmt gjaldskrá. Ljósritun og skönnun með Princh – leiðbeiningar Notið spjaldtölvuna til að ljósrita og skanna Ljósritun með Princh: Til að ljósrita: 1. Veljið Copy á spjaldtölvunni hjá prentaranum 2. Veljið hvort ljósrita skuli af glerinu eða mataranum 3. Setjið blaðið/blöðin á glerið eða í matarann og veljið Copy 4. Farið yfir stillingarnar (fjöldi eintaka, svarthvítt/litur) 5. Greiðið með einum af greiðslumöguleikunum Gjald fyrir ljósritun (A4) er samkvæmt gjaldskrá. Skanna með Princh og senda í tölvupósti: Skönnun er ókeypis. Til að skanna skjal: 1. Veljið Scan to e-mail á spjaldtölvunni hjá prentaranum 2. Veljið hvort skanna skuli af glerinu eða mataranum 3. Setjið blaðið á glerið eða í matarann og veljið Scan now 4. Sláið inn netfangið og veljið ykkur a.m.k. 4 stafa skammtímalykilorð (bókstafir, tölustafir eða blanda) 5. Skoðið tölvupóstinn ykkar og opnið póstinn frá Princh 6. Smellið á hlekkinn í tölvupóstinum og sláið inn skammtímalykilorðið sem þið völduð ykkur 7. Sækið skjalið/skjölin og hlaðið þeim niður í tækið ykkar Athugið: Þessi hlekkur mun aðeins virka í 24 klst, gætið þess að hlaða skjalinu niður í tækið ykkar innan þess tíma. Krílahornið Á barnadeildinni er sérstakt Krílahorn með gjafaaðstöðu. Lokanlegt hlið er inn á barnadeildina svo litlir lestrarhestar geti gengið frjálsir um. Þar eru þægilegir grjónapúðar, harðspjaldabækur og fleira sem henta krílum. Börn og fjölskyldur eru hvött til að koma á barnadeildina og vera saman við lestur, leik og spilamennsku. Lesaðstaða Á 2. hæð eru borð og stólar á mörgum stöðum þar sem fólki er velkomið að koma sér fyrir með bækur eða tölvur. Lesstofa Á 3. hæð er lesstofa fyrir 16 ára og eldri þar sem er gott að læra eða vinna í rólegheitum. Lesstofan er opin á sama tíma og bókasafnið. Á lesstofunni, sem og á bókasafninu öllu, er opið, þráðlaust net. Til að prenta út þarf að nota tölvur í netkaffinu. Setustofa Í Setustofunni á 1. hæð er hægt að sitja og fletta dagblöðum, tímaritum eða bókum og eiga notalega stund. Boðið er upp á kaffi og hægt að tefla eða spila. Þar eru einnig DVD-myndir, hljóðbækur og munasafn.
